Home Politica Na Hulanda dos compania a mustra gobierno interes pa tuma e refineria...

Na Hulanda dos compania a mustra gobierno interes pa tuma e refineria over!

0
0
SHARE
- Advertisement -

Nan ta indigna di e falta di aprecio ricibi:

ORANJESTAD (AAN) – Den conferencia di prensa di Fraccion di Partido Democracia Real, su lider politico mr. Andin Bikker a expresa cu PDR kier haya sa kico ta e plannan di gobierno pa e refineria.

Parlamentario mr. Bikker a señala cu esaki ta pa motibo cu Banco Central a caba di ahusta, dia 25 di April, e crecemento economico cu gobierno a broma cune cu ta 5.1 porciento, na 2.6 porciento cu ta casi mitad di loke gobierno a premira.

Parlamentario mr. Bikker a subraya cu esaki tin consecuencia tambe pa e presupuesto di nos pais, pasobra den dje ta claramente bisa cu henter e presupuesto ta basa riba un crecemento di 5.1 porciento.

Banco Central a pone den su comunicado di e fecha ya menciona cu por bin un cambio si tin reapertura di e refineria.

E parlamentario a señala cu no mester lubida cu tin hopi hende cu ta biba den e area di San Nicolas cu ta depende di e desaroyo di e refineria.

E parlamentario a subraya cu no mester lubida cu mas di 700 hende a traha na e refineria directamente y fuera di esey mas cu mil a traha indirectamente pa subcontratistanan cu ta mantene e refineria.

Un average di dos mil hende a keda sin trabao, y esey ta pone cu e personanan aki ta bao di expectativa ta kico ta bay pasa cu e refineria.

Parlamentario mr. Bikker a agrega cu durante su bishita na Hulanda e tabata tin un reunion cu a wordo pidi cu su persona, for di no menos cu dos compania cu a manda “letter of intent” na gobierno.

Esaki a sosode dia 7 di September 2012 door di e compania Petro Holand, y tambe dia 27 di September 2012 un otro compania, di cual e no tin su nomber ainda, a manda un carta di intencion pa gobierno unda nan ta specifica cu nan kier tuma over e refineria, y aparentemente cu e deseo di mantene tur hende na trabao.

Cu otro palabra tin tres compania, entre otro Pro-Diesel cu den pasado a mustra interes y mr. Bikker tin prueba palpable, cu a ofrece pa tuma e refineria over y mantene e cuponan di trabao.

Parlamentario Bikker a subraya cu e no ta compronde pakico gobierno a haci hopi fanfarea, a bay hopi caminda pa topa cu Petrochina, pero no a dedica atencion na e otro companianan aki.

E parlamentario por a compronde cu e companianan aki ta hopi indigna cu nan a haya un trato di menos aprecio di parti di gobierno, y tambe di e banco cu ta negocia den nomber di Valero, pasobra nan tin e impresion cu e compania aki no kier bende.

Valero a pidi nan tur sorto di documento hasta un plan comercial, locual pa nan no tin sentido.

Parlamentario mr. Bikker a agrega cu e “settlement agreement” cu a wordo cera cu Valero, tin un clausula cu ta bisa cu si den dos aña Valero bende e refineria, mester paga na Aruba, entre otro, diez miyon dollar.

PDR tin e impresion cu parti di e refineria a wordo cera, pa den e dos añanan y mey aki bay den transhipment pa purba gana placa riba esaki, y despues di 2013 numa mustra interes pa bende esaki.

PDR ta haya esaki straño, pero en todo caso, nan ta bay pidi gobierno e dos documentonan aki pa nan sa nan contenido y si no duna nan den tres siman ta hibe Corte, pasobra nan ta un poco cansa caba, cu di 2009 bin ariba cu nan ta den Parlamento, cu ora di pidi gobierno documento nan no ta contesta pregunta siendo cu tin un ordenanza pa transparencia di gobernacion, cu ta delinea duidelijk cu den tres siman minimo, cualkier ciudadano cu pidi un documento cu ta den dominio publico, mester por haye y si no e por bay Corte.

- Advertisement -

DUNA COMENTARIO

Please enter your comment!
Please enter your name here