Home Politica Gabinte Eman mester a explora otro opcionan pa ubica e Hospital nobo

Gabinte Eman mester a explora otro opcionan pa ubica e Hospital nobo

0
0
SHARE
- Advertisement -

Segun  Fraccion MEP:

Teniendo debido cuenta cu calamidad y trafico

ORANJESTAD   (AAN):   Durante e debate publico riba e renobacion y ampliacion di nos Hospital a sali na cla cu Gabinete Eman a scohe pa laga e Hospital na e lugar existente sin tene debido cuenta cu e asecibilidad ora cu calamidad presenta y tambe cu e trafico congestiona riba e rutanan cu ta conduci na nos Hospital. Un Gobierno responsabel lo a tene debido cuenta cu calamidad y e trafico y lo a explora otro opcionan pa e ubicacion di nos Hospital.

Nos a yega di experencia na nos Pais cu ora tin awacero fuerte, e area rond di nos Hospital ta bay bou di awa y ta haci cu e Hospital ta bira dificilmente acesibel hasta pa ambulance. Si na nos Pais presenta un situacion di mal tempo na unda cu olanan grandi subi tera, e proximidad di nos Hospital na nos beachnan tambe lo dificulta e acecibilidad di nos Hospital.

Podise hopi no ta imagina nan mes un calamidad asina, pero naturalesa a demostra nos poco tempo pasa su forza di destruccion na New York, na unda tampoco por a pensa algo asina. Pesey di un inversion cu lo costa nos Pueblo 1.000.000.000 florin, nos Gobierno mester tabata prudente suficiente y laga Rampenbureau traha un rapport pa mustra Pueblo si e ubicacion di e Hospital ainda ta esun ideal teniendo cuenta cu calamidadnan cu por presenta.

Pa locual ta e trafico, nos por a tuma nota cu Gobierno a sali for di e punto di salida cu e Hospital ta acesibel den 18 minuut for di Sanicolas. Gobierno a tuma e conclucion aki for di e rapport Commissie Zienkenhuis 2002, cu e tempo ey a premira cu nos Pais na 2015 lo tin 97.000 hende y cu ta tuma e ambulance 18 minuut di IMSAN pa yega na Hospital na Eagle.

Pero e realidad ta cu nos Pais ta conta desde oktober 2012 cu 114.085 hende y cu mas di 60.000 auto riba nos careteranan y pesey e trafico na nos Pais riba cualkier ora di dia ta basta congestiona. Specialmente L.G. Smith Boulevard na altura di Parlamento bay direccion di e hotelnan ta basta congestiona y cu e benida di e tram den Centro di Oranjestad, ta pior e situacion den trafico lo bira. E otro ader pa yega nos Hospital, cual ta e caminda di Paradera direccion Tanki Flip y Pos Abou tambe ta basta congestiona.

Pesey e ta imcomprendibel con Gobierno hunto cu e team di architectonan y tambe infrateam por a yega na e conclucion cu e Hospital ainda ta asecibel den 18 minuut manera premira den e rapport di 2002 y cu pa e motibo aki e ubicacion existente ta e mihor opcion pa nos Hospital.

Un Gobierno responsabel lo a tene debido cuenta cu e retonan di calamidad y e trafico y lo a explora otro opcionan pa e ubicacion pa nos Hospital. Lamentablemente Gabinete Eman ademas di no a explora otro opcionan pa e localidad di nos Hospital, tampoco no por a presenta un rapport di Rampenburaeu y tampoco un estudio di trafico cu ta hustifica e ubicacion existente pa nos Hospital.

E hustificacion cu Gabinete Eman a duna, ta cu e lo ta un molester y tambe costoso pa laga e specialistanan medico cu tin nan consultorio den cercania di Hosptal muda for di e sitio. Tambe cu lo tin un costo di 35.000.000 florin si mester muda e kabelnan di utilidad di nos Hospital. Pa esaki mester remarca cu den e masterplan di Hospital, e specialistanan lo tene nan consultorio den Hospital mes, dus di tur manera na fin di dia e oficinanan di specialista lo disparce y haya otro destino.

Pa locual ta e gastonan miyonario di kablenan di utilidad, esaki por a wordo cubri cu e 40.000.000 florin cu Gabinete Eman a haya door di a traspasa e edificio di Hospital pa SOGA.

Pues asina ta bira bisto cu Gabinete Eman no por hustifica e fayo di a keda sin explora otro opcionan pa ubica nos Hospital, teniendo debido cuenta cu calamidad y trafico, segun Parlamentario Ruiz Maduro di Fraccion di MEP.

- Advertisement -

DUNA COMENTARIO

Please enter your comment!
Please enter your name here