Home Politica Tres Generacion ta admira y sostene Mike Eman den su atencion pa...

Tres Generacion ta admira y sostene Mike Eman den su atencion pa pueblo

0
0
SHARE
- Advertisement -

ORANJESTAD(AAN): Durante su recorido den e bario di Papaya diahuebs mainta, Prome Minister Mike Eman a pasa na residencia di famia Viola Arrindell. Despues di algun minuut di a combersa y intercambia pensamento riba loke e bario tin mester, nan a haya e grato bishita di señora Arrindell su mama. Nan dos, como tambe e nieta, no a sconde nan satisfaccion y sosten pa e maneho y accion di e mandatario.

   Maria Quijada a keda gratamente sorprendi pa e bishita di Prome Minister di Aruba na cas di su yiu. “Mi ta hay’e hopi bon cu e ta bishita e barionan y cu sikiera bo ta wak e. Bo ta mir’e. E otro gobiernonan bo no tabata mira nan riba caminda, bo no tabata mira nan ta atende cu ningun hende,” e wela a indica. Originalmente di e bario di Tarabana y wanta duro na su walker, el a expresa tambe con esaki ta un gobierno diferente na esun prome.“

   Aworaki bo ta ripara cu e gobierno ta sali, bo ta papia cu e ministernan, ta mescos cualkier hende.” Rapidamente señora Quijada a nota cu Prome Minister ta un persona humilde y sin ningun pretension. “Mike ta mescos cu cualkier hende di cas. Mi ta hopi contento cu mi a mir’e.” Su yiu muhe a splica e bishita di Mike Eman den e bario ta algo ‘tremendo’y ‘nunca bisto’. E motibo cu e ta bisa esey ta paso, na su opinion, no tin miho manera pa yuda un pueblo cu ta yegando mas cerca di dje. Viola Arrindell a declara cu Prome Minister “ta bay wak kico ta nan necesidad, problema y angustia.

   Otro Gobierno nunca a haci esaki e cos aki, hamas. E prioridad di un gobierno ta conoce bo pueblo. Ta e unico manera pa sa con pa yuda y e gobierno aki ta haciendo su best.” Mas aleu el a bisa cu hopi hende no tin pasenshi. “Nan ta keha di buraco y cayanan cera, pero bo mester carga pasenshi. Prome Minister tin un meta y tanto tempo cu e kier caba cu nan.”

   Como habitante di e bario pa mas cu 10 aña, el a probecha e bishita di e mandatario pa splik’e personalmente e necesidadnan di Papaya cu ta enfoca riba asfalt, luz pa e camindanan y un luga recreativo pa e muchanan por hunga. Prome Minister a dun’e su palabra, cu e lo dirigi e peticionnan aki na e Minister di Infrastructura y cu e bario lo bay den e lista pa drecha caminda y tambe lo papia riba e posibilidad di bin cu un luga caminda e muchanan di e bario por hunga y e otronan por haci deporte.

   E di tres generacion, den persona di e nieta di Maria Quijada, no a keda atras y tambe a duna su comentario tocante e bishita di Prome Minister. “Ami ta hayele hopi bon. Mike semper a haci esey, henter e ultimo tres añanan. E ta bay den barionan y papia cu e hendenan. Di e otronan bo no ta haya esey. P’esey mi ta goz’e. Mi ta pidi’e pa e sigui haci esey.” E ta gusta e manera con e mandatario ta hibando un maneho caminda ta duna atencion no solamente na e asuntonan di interes general for di su oficina, pero tambe atencion personal na e ciudadanonan bishitando cada bes otro bario den su Accion di Bario di tur siman. E hoben a bisa adicionalmente cu e hecho aki ta “ta mustra cu bo ta traha pa e pueblo di Aruba. Bo sa kico nan mes kier y bo ta bin cu ideanan pa medio di e pueblo. Si bo ta den e bario, bo sa kico nan mester y bo sa kico pa pone como prioridad. Ta bon cu un prome minister ta haci esaki, na luga di sinta na oficina y manda su hendenan. Asina bo no ta experiencia e dolor di bo pueblo. Mike semper a hacie.” Di e manera aki tres generacion di hende muhe Arubiano ta duna nan aprobacion y sosten na e gestion di Prome Minister Mike Eman. Nan ta testigo di con e mandatario ta hala manga di camisa y cana den e cayanan di bario pa yega mas cerca cu por di su hendenan y comparti cu nan, cara a cara, loke e bario tin mester y hunto yega na e solucionnan pa un miho Aruba.

- Advertisement -

DUNA COMENTARIO

Please enter your comment!
Please enter your name here