Home Politica Corte a dicidi cu aseguro di AZV no ta caduca djis paso...

Corte a dicidi cu aseguro di AZV no ta caduca djis paso a keda sin renoba zorgpas

4
0
SHARE
- Advertisement -

PDR: AZV no por cambia ley via maneho
ORANJESTAD (AAN): E siman aki Corte a tuma un decision hopi interesante y su esencia ta bay mas leu di e caso specifico den cual el a worde dicta. Corte a dicidi cu e caarchi cu cada asegurado ta haya di AZV (“zorgpas”) no ta caduca, ya cu den e ley di AZV no ta para cu un inscripcion permanente lo caduca despues di 5 aña. E hecho cu e Organo Ehecutivo di AZV a dicidi di bin cu un “maneho” cu cada 5 aña mester cambia zorgpas no tin efecto paso e ley di AZV no conoce un termino asina pa inscripcion permanente. Si e Organo Ehecutivo di AZV kier pa bin un periodo defini pa validez di e zorgpas, e mester acudi na e legislador (cual ta Gobierno y Parlamento) pa efectua un cambio den e ley di AZV. Cu otro palabra: un organo cu ta ehecuta un ley (“bestuursorgaan”) no por cambia ley zomaar pa medio di un maneho.
E decision ta importante paso den pasado reciente AZV tabata manda aseguradonan carta mencionando cu si nan no acudi pa busca nan zorgpas nobo, nan lo termina nan inscripcion na AZV, lagando nan sin seguro.

PDR destijds a protesta publicamente contra e maneho ey di AZV. Awor a bin resulta cu PDR tabata tin rason: e zorgpas no ta caduca sin mas y AZV no por saca un persona for di e sistema di AZV djis paso e no a bin “renoba” su zorgpas.

E decision di Corte tambe ta subraya e autoridad di e organonan legislativo cu ta traha ley, un otro tema cu fraccion di PDR varios biaha a bin ta mustra riba dje den Parlamento: instancianan ehecutivo tey pa ehecuta ley, nan no por bay purba cambia ley via maneho paso nan no ta legislador.

Por ehempel Directie Economische Zaken den pasado reciente tabata pidi mucho mas rekisito cu ta para den ley ora di aplica pa permiso di negoshi. Esaki tabata trece tardansa y gastonan innecesario cune. Riba insistencia di PDR e Minister concerni a instrui e Directie pa coregi e maneho.

PDR a mustra varios biaha cu e fenomeno aki di “amplia” ley via maneho, cual ta conoci como den terminonan juridico como “pseudo-wetgeving”, no ta conforme nos Constitucion: no por ta asina cu e autoridad di organonan legislador democraticamente eligi, ta worde sobrepasa door di notanan di maneho (“beleidsregels”) cu ta bay mas leu cu e ley mes of ta cambia e esencia di e ley, sin acudi na Parlamento.

Pa evita cu Pueblo, cual Parlamento ta representa, ta worde confronta cu exigencianan innecesario cu no ta para den un ley, lo ta bon pa Gobierno haci un analysis si tin mas nota di maneho cu kizas lo por ta sobrepasando e mandato cu e legislador a duna pa ehecuta e ley concerni.

- Advertisement -

DUNA COMENTARIO

Please enter your comment!
Please enter your name here