Home General Congreso di MEP 2011 a demostra cu e partido ta mas grandi...

Congreso di MEP 2011 a demostra cu e partido ta mas grandi cu nunca

2
0
SHARE
- Advertisement -

Segun comunicado di MEP:
ORANJESTAD(AAN)– Segun un comunicado di MEP relaciona cu e congreso di MEP 2011, ayera tabata e dia grandi pa e candidatonan pa lider di MEP, esta Ady Thijsen, Evelyn Wever-Croes y Carl Giel, pasobra un di nan lo bira e lider maximo di MEP. E comunicado a menciona cu ya for di oranan tempran di mainta, tabata tin un multitud cu a aglomera den ballroom di Westin Hotel, pa asina deposita nan voto pa nan candidato favorito. E Congreso a wordo declara habri pa Dr. Gerrit Croes, kende ta presidente di Congreso, despues cu e himnonan di Aruba y di MEP a wordo canta na inicio di e programa. Despues Sra. Maria Curiel a bin cu un bunita oracion pa asina pidi Papa Dios pa drama su bendicion riba un y tur cu a asisti na e Congreso y tambe duna forsa na e candidatonan pa lider.


Mientras tanto, sr. Eddy Briesen, a keda encarga pa duna e relato financiero pa loke ta trata e partido y a haya descharge di e publico. Relato financiero a keda aproba.

E comunicado a menciona cu un fanfaria gigantesco di parti di militantenan di MEP, a saluda e lider saliente, sr. Nelson Oduber na momento cu el a haci su entrada cu un cara sumamente sonriente den e ballroom, pa asina duna su ultimo discurso como lider maximo di MEP.

Durante e mainta aki, den presencia di sr. Oduber, a tuma lugar aprobacion di varios resolucion den e statutonan di e partido. Esaki a wordo aproba unanime pa e publico.
Entre e resolucionnan cu a keda presenta, a wordo proclama cu sr. Oduber lo keda como lider maximo honorario di e partido.

Durante e ultimo discurso di sr. Oduber como lider, cu hopi emocion, el a remarca e bon y e menos bon momentonan cu el a pasa aden, fungiendo como lider maximo pa 25 aña y alabes a gradici su famia en particular pa e pasenshi cu nan a brinde tur e añanan aki durante cu e tabata lider di MEP. Tabata momento cu hasta lagrima a cay di parti di sr. Oduber.

E comunicado a sigui menciona cu por bisa cu esaki cu a marca historia den e 40 añanan di existencia di partido, caminda 3 candidato a postula nan mes pa bira lider di e partido aki. Partido cu hopi hende a tilda cu lo bay caba na nada, sin embargo pueblo a mustra cu esaki ta net lo contrario.

Tambe cu awor aki MEP ta mas solido cu nunca y cu un forsa di horcan lo pasa pa e siguiente aña y mustra cu nan lo bolbe bek den gobernacion.

Mientras tanto votacion tabata tumando lugar na e momentonan ey y tin cu bisa cu tabatin un rij sumamente largo, caminda esnan cu a registra tabata depositando nan voto. Esaki a conclui mas laat durante atardi pa despues mira ken lo bira e proximo lider di Partido Movimiento Electoral di Pueblo.

- Advertisement -

DUNA COMENTARIO

Please enter your comment!
Please enter your name here