Home General School mester por cuminza mas laat mainta

School mester por cuminza mas laat mainta

2
0
SHARE
- Advertisement -

Egberto Werleman:
ORANJESTAD (AAN): Un famia cu ta
reza hunto, ta hunto, un famia cu
ta come hunto, ta keda hunto!!
Esey ta loke e ciudadano
Egberto Werleman, kende den
pasado a yega di aparece riba un
lista politico, a splica na DIARIO.
“Mi por corda cu tempo mi tabata
studiante na Hulanda, 6’or ta un
ora sagrado, no ta ricibi bishita
ni telefon. Mi tabata haye straño
y mi no por comprende. Awendia mi ta comprende su nificacion, relevancia y balor. Mescos cu nos dicho bieu, cu ta parce lubida, ainda tin nificacion, relevancia y balor pa edifica nos comunidad den temponan turbulento.”
Segun Werleman, loke ta kibrando nos comunidad y nos famianan ta cu nos no tin tempo mas pa otro, nos ta yega cas cansa y caba. Ta parce cu nos a bira esclabonan di moderno di nos trabao pa nos por sobrebibi, lubidando riba nos sernan stima. Hopi biaha nos no tin tempo pa papia, pa combersa y pa un cariño, un sunchi y un braza. Nos ta asina cansa, cu nos ta lubida nos creatividad.

Solucionnan simpel ta hari cu nos y nos no ta waknan. Kico ta costa nos ta lanta un ora mas tempran, sinta na mesa, bati pan y traha papa, pa nos yiunan ta bon comi. Un bon desayuno ta haci nos muchanan mas fuerte, mas saludabel y por concentra mihor na school.

E momento, e un ora ey, cu bo ta comparti cu bo famia ta un ora di “ quality time” gana. Mescos nos por haci anochi, cushina hunto y come hunto, y e union familiar lo crece. Solucion simpel ta den nos cara, cu ta hari cu nos tur dia y nos no ta waaknan!

Werleman a indica na DIARIO, cu pa logra esaki promer nos mester bin cu un cambio di mentalidad den nos mes. Nos sernan keri y nos famia mester bin back na promer lugar y no nos trabao.

Nos tin cu comprende cu nos ta traha pa biba y nos no ta biba pa traha. Tambe gobierno y comercio tin di comprende cu nan tambe tin un responsabilidad social. Si e barco hundi, ta nos tur ta hoga, ta e djacanan so ta scapa!! Gobierno como un di e dunadornan di trabao mas grandi por cuminza y duna e bon ehempel door di adapta su orarionan di trabao y haci “flexwerken” posibel.

“Mi sigur cu comercio tambe lo ta “open-minded pa e idea y experimento aki.” Un simpel cambio di horario lo ta un revolucion den enseñanza. Laga school cuminza mas laat y caba mas laat. Estudionan realiza door di diferente universidad renombra a demostra cu si school cuminza mas laat su benificionan pa enseñanza lo ta enorme.

Un hoben bon drumi y bon comi ta cla pa bay guerra mes ora. Ademas si tur school por tin su “open-leercentrum” na unda hobennan por sinta traha nan huiswerk den nan oranan liber y despues di school y hinca “husiwerkbegeleiding” den bo curriculum. Lo scapa hopi mayor di gastonan inneccesario.

Tribi di soña y traha pa soñonan bira realidad. Cosnan simpel y barata, lo por tin un impacto grandi den nos nos cuminza, di pan bati y papa, si bo kier arepa tambe tin! Basta nos usa nos cabez y “common sense”. Tribi di soña y traha pa bo soñonan bira realidad. No bisa boluntad ta hopi, pero e caminda ta leeuw, pero laga nos tur bisa: “Caminda ta leeuw, pero boluntad ta grandi y bunita!”

Den pasado, DIARIO mes a yega di indica con investigacionnan den exterior a mustra cu ora les cuminza mas laat mainta, cu e alumnonan ta “mas spierto” y “mas atento” pa pone atencion. Algun school hasta a cuminza start cu nan prome lesuur como 30 minuut mas laat. Tin algun pais unda awor school ta cuminza pa 10’or di mainta.

- Advertisement -

DUNA COMENTARIO

Please enter your comment!
Please enter your name here