Home General Reunion fructifero cu Connexxion pa logra un rumbo nobo y positivo pa...

Reunion fructifero cu Connexxion pa logra un rumbo nobo y positivo pa Arubus

0
0
SHARE
- Advertisement -

Situacion financiero ta serio segun minister Otmar Oduber
ORANJESTAD(AAN): Minister di transporte Otmar Oduber ta atendiendo reunionnan importante na Hulanda cu lo nifica tambe e direccion cu kier hiba Arubus. E compania Connexxion na Hulanda ta bay tin un rol importante den e rumbo cu gobierno di Aruba lo kier hiba Arubus cu ta den problemanan financiero hopi serio. Despues di e reunion a logra entrevista cu minister Otmar Oduber cu a cuminsa na splica cu esaki ta un reunion mas cu esnan di Connexxion. Esaki ta e compania mas grandi di transporte publico na Hulanda. Den un forma mas structura gobierno a hiba combersacion cu e compania di transporte di Hulanda. Nan experiencia ta hopi y nan interes ta grandi. A haya un idea con e transporte publico ta hinca den otro na Hulanda. Di tur dos banda e reunion a bay den un forma hopi positivo.


Arubus pa hopi aña no a funciona manera un compania cu mester purba traha riba un forma di break even mester funciona. Minister Otmar Oduber a splica cu tin hopi desgaste actualmente den Arubus.

Naturalmente Connexxion a mira e cifranan y a saca e mesun conclusion cu directie, accounting buro y hunta di comisario na Aruba a conclui tambe den e cifranan cu nan a mira cu tin hopi gastonan halto.

No ta un secreto cu e payroll di Arubus ta demasiado halto segun e mandatario si compare cu Hulanda, region y Aruba mes. E gastonan ta desproporcional si mira e gastonan cu un compania mester tin.

Connexxion mescos cu na Aruba ta worde subsidia pa gobierno di Hulanda. Tin normanan internacional y esaki ta cu 40 pa 50% di nan operacion ta worde subsidia door di gobierno. Na Aruba e subsidio ta core rond di 65 of casi 65% di subsidio y esaki ta mustra cu algo fundamental no ta bon y cu tin algo robez den e compania segun minister Otmar Oduber.

E fuel ta subiendo y por a constata cu tur aña e gastonan di Arubus a keda aumenta tambe. Mientras cu e gastonan a aumenta no a zorg pa e tarifanan worde adapta. Connexxion cu lo bin Aruba lo duna un man pa splica kico e participacion mester ta di gobierno.

A mustra minister Otmar Oduber cu awendia mesun turista ta goza di e tarifa social cu ta worde subsidia pa gobierno. E pregunta ta si por moderniza Arubus pa asina e por distingui e turista cu e local? E mandatario a splica cu e forma di traha cu Arubus ta hopi anticua.

 Tin diferente programa cu e compania di Connexxion por ofrece na Arubus cu ta pone e eficiencia di Arubus mas amplio. Tin hopi tecnologia actual cu na Aruba no ta worde usa. Entrenan via celular haya sa unda ta e bushalte mas cerca y ki ora e bus ta pasa.

Tambe Connexxion tin un programa completo pa sa precisamente ki ora ta pone un bus grandi of un bus mas chikito y asina draai mas eficiente y haci cu e compania ta perde menos placa. Berdad Arubus ta un servicio social pero esey no kiermen cu e mester bira un peso pisa pa presupuesto di gobierno.

Finalmente a puntra e mandatario kico lo pasa cu e top den e maneho di Arubus? Lo bin sanger nobo den maneho di Arubus? Minister Otmar Oduber a splica cu mester a cuminsa inventariza y mester a mira bon durante algo mas cu un aña unda e zapato tabata primi den Arubus. Gerencia di Arubus mes ta conciente cu cambionan mester bin.

Como Minister encarga e ta hopi contento cu e coperacion di directie tey. E sindicato ta na altura di futuro cambionan y a papia tambe cu e empleadonan indicandonan cu e situacion no ta cos di canta macamba na Arubus.

Tur hende cu tin di haber cu Arubus a haya un presentacion y sa precisamente kico e situacion ta na Arubus. Si no lanta e nivel di Arubus nifica cu e existencia di Arubus ta na peliger e minister a bisa finalmente.

- Advertisement -

DUNA COMENTARIO

Please enter your comment!
Please enter your name here