Home General Polis envolvi den desgracia basta pisa diasabra marduga na Paradera

Polis envolvi den desgracia basta pisa diasabra marduga na Paradera

2
0
SHARE
- Advertisement -

ORANJESTAD(AAN):– Diasabra marduga den careda di 3or y 50 central di polis a haya un melding cu tin un accident cu 3 auto y hendenan herida. Esaki a sosode riba e caminda di Paradera dilanti Hong Kong Supermarket. Mesora a manda patruya di polis di Noord y Oranjestad bai na e sitio. Na yegada di patruya a bin topa cu 3 herido y tambe cu 3 auto envolvi. A pidi pa ambulance bin cu urgencia pasobra tin un persona cu ta polis tambe den e accidente y el a haya basta sla na su pia. Tabata tin un kap basta grandi cu tabata sangra hopi.
Un otro persona tabata tin kap na cabes y e di tres persona cu corta na cara. Ambulance a dura basta prome cu a yega. E patruya mes a hiba nan colega pa Hospital cu urgencia pasobra e tabata perdiendo hopi sanger y a cuminsa haya basta dolor.

El a cuminsa cambia di color tambe y esey a trece un tiki preocupacion cerca su coleganan.
E prome Ambulance a dura 30 minuut aparentemente prome cu el a yega. E ambulance a bin cu tur trankilidad sin zwaai licht y sirena.

E di dos Ambulance a yega despues di 40 minuut. Den e accident e autonan envolvi ta un Toyota Starlet y otro auto ta un Nissan Pickup mescos un Volkswagen. E Starlet y e Nissan ta riba mes un banda di caminda direccion pa Rotonde Tanki Leendert y e Volkswagen tabata direccion pa Rotonde Paradera.

E chofer di e Volkswagen pa un of otro motibo a bai na su man robes dal den e Starlet na banda y despues bai dal frontal riba e Nissan. Mientras tanto e chofer di e Starlet a desvia y a baha caminda na su man robez.

E daño material tabata bastante y a pidi presencia di polis di trafico na e sitio. Takelwagen mester a haya tur auto pasobra ningun por a sigui core riba nan mesun forza.

- Advertisement -

DUNA COMENTARIO

Please enter your comment!
Please enter your name here