Home General Esfuersonan pa libra Aruba di brandstofclausule lo ta parti di presentacion

Esfuersonan pa libra Aruba di brandstofclausule lo ta parti di presentacion

4
0
SHARE
- Advertisement -

Awe dialuna tin dialogo social riba energia
ORANJESTAD(AAN): Tanto gremionan como Gabinete Mike Eman a mira e interes pa haci maneho di energia un parti di e dialogo social entre partnernan social y gobierno. Pa e motibo aki Dialuna lo tin un dialogo social netamente riba e tema di energia. Pronosticonan internacional ta mustra cu prijs di petroleo riba mercado mundial lo sigui subi den e siguiente decadanan. For di e prome dia di gobernacion e topico di energia tin un prioridad hopi halto pa e gobierno actual y ta parti integral di e vision di Gabinete Mike Eman.


E maneho di e energia 2009-2013 tin como fin pa reduci y stabilisa gastonan di produccion di awa y coriente di un manera sostenibel di bon pa nos medio ambiente. Gabinete Mike Eman a move rapidamente pa elimina e dependencia na fuentenan convencional pa produci awa y coriente, manera fuel-oil, pa otro aña.

Durante e prome Green Energy Conference teni na Aruba na fin di september 2010, Gobierno a anuncia oficialmente su maneho di energia. Esaki ta consisti di e.o. di e redoblacion di e capacidad di energia di biento. “WEB ta finalisando e bid pa expansion di energia di biento cu 30 mw mas (20% adicional di capacidad)”, segun premier Eman.

Directiva di WEB ta poniendo su maximo esfuerso pa finalisa e cambio di e turbinanan existente pa turbinanan mas moderno, efectivo cu por traha riba gas tambe. “E proyecto aki lo conclui den e di dos mitar di 2012”.

E introduccion di gas como fuente pa produci awa y coriente a ser formalisa den e memorandum of understanding entre Valero y Aruba. E reparacion di relacion cu Valero no solamente a resulta den e Settlement Agreement cu Valero y reapertura di refineria, pero awe ta e base pa un jointventure pa conversion di fuel-oil pa gas.

Como cu prijs di gas ta hopi independiente di e prijs di fuel-oil y tambe mas abou y mas stabiel, esaki lo nifica un reduccion substancial den e gastonan di produccion di awa y coriente. “Un parti importante di e conversion aki ta cu e ta sostenibel y bon pa nos medio ambiente. Nos lo reduci nos emision nan di CO¬2 pa casi 70%”, minister De Meza encarga cu Utilidad y Energia a informa.

Refineria Valero a presenta na Gobierno caba su plan nan pa construccion di un pier pa tankeronan di gas como tambe un tanki riba e tereno di e refineria. Tambe e gigante den gas na Hulanda, e empresa di estado, GasUnie, ta dunando nan aporte na e proceso aki.

Durante e proceso di Dialogo Social participantenan tambe a reconoce efectonan negativo di prijs mundial di petroleo riba nos economia. “A rais di esaki, Gobierno a reduci e impuesto di importacion substancialmente na un tarifa simbolico di 2% pa tur aparato cu ta produci energia alternativo”.

Gobierno di Aruba a cera alianzanan cu partnernan strategico riba tereno di energia manera TNO y TU Delft cu fin di explora formanan pa maneha produccion di awa y coriente di un manera mas sostenibel y faborabel.

“Nos no ta exclui cu den futuro desperdicio residencial cu ta worde kima awor na dump, tambe lo por bira un fuente di energia pa Aruba”, premier Eman a ilustra. “Uso di panel nan solar como fuente di energia pronto lo ta algo hopi normal na Aruba prome cu fin di e periodo di gobernacion aki”.

E prijs di petroleo a subi cu casi 30% den e ultimo lunanan aki. Danki na e vision di Gabinete Mike Eman a logra limita e efecto aki rond di 10% riba e prijs di awa y coriente. Ehecucion di un maneho di energia ta rekeri hopi perseverancia y tempo.

“Tur dia nos ta personalmente activo cu e issue aki”, ambos mandatario a declara. “E resultado di e maneho di energia di nos gobierno nobo lo duna Aruba independencia di fuel-oil como fuente di energia y libra nos comunidad di e efectonan di brandstofclausule cu ta acopla asina fuertemente na prijs di petroleo.

Den e dialogo social lo comparti pensamento con hunto por atende cu e situacion te cu e momento cu Aruba pa medio final di 2012 a bira independiente di fuel-oil cu 40% di energia di biento, 10% solar y 50% riba gas.

- Advertisement -

DUNA COMENTARIO

Please enter your comment!
Please enter your name here