Home General Diabierna awor lo trata e ley di edad di pensioen pa Parlamentario...

Diabierna awor lo trata e ley di edad di pensioen pa Parlamentario y Minister

2
0
SHARE
- Advertisement -

ORANJESTAD(AAN): Diamars DIARIO a entrevista presidente di Parlamento Paul Croes, relaciona cu un reunion sumamente importante cu ta bay tuma lugar den parlamento Diabierna.
Segun Croes, durante e ultimo simannan di aña Parlamento di Aruba ta bay tin un agenda hopi druk. El a splica cu tin diferente ley cu a yega parlamento di cual algun a Sali for di e Dialogo Social. E leynan aki a wordo considera como un prioridad, mirando cu despues di hopi aña entre otro Gobierno, sindicato y gremionan a sinta cu otro.
For di e dialogo aki a Sali algun producto y esakinan tin cu pasa via ley, pa nan por drenta na vigor. Croes a sigui bisa cu Diabierna awor den Staten lo papia riba e topico di e asina yama ‘Financiele Voorzieningen’ cu ta trata e pensioen di politiconan aki na Aruba.

Esaki ta encera miembronan di parlamento y Ministernan, como tambe esnan di a yega di sinta como parlamentario of Minister. Cambionan grandi den e leynan aki cu a wordo proponi y a wordo treci parlamento, ta entre otro edad di pensioen.

Na e momentonan aki ta asina cu si bo tabata of ta un Minister, bo por cuminza cobra bo pensioen na edad di 45 aña, mientras cu parlamentarionan por hasi esaki na edad di 50. E proposicion cu ta bay wordo trata Diabierna awor ta cu bo ta bay di 45 pa 60 aña pa bo por cuminza cobra bo pensioen como Minister y pa parlamentario esaki ta di 50 pa 60 aña.

Segun presidente di parlamento, e cambionan aki lo tin un impacto fuerte riba e politiconan na Aruba y e ta un discusion politico sumamente interesante pa pueblo sigui.

- Advertisement -

DUNA COMENTARIO

Please enter your comment!
Please enter your name here