Home General Minister Otmar Oduber un biaha mas a revela mentiranan di Booshi Wever...

Minister Otmar Oduber un biaha mas a revela mentiranan di Booshi Wever y henter fraccion di MEP

1
2
SHARE
- Advertisement -

“Hopi biaha nan ta purba haya palo pa bati e cacho aki, pero e cacho aki no ta worde permiti pa worde bati a base di mentira”
ORANJESTAD (AAN): Dialuna atardi Minister Otmar Oduber a yama un conferencia di prensa pa contraresta e atakenan baho y mentiroso cu fraccion di MEP a bin cune durante nan conferencia di prensa. El a indica cu un biaha mas por a scucha di parti di oposicion un cantidad di cosnan cu no ta cuadra cu realidad, caminda cu por a tuma nota di e regreso di Sr. Booshi Wever ora el a cuminsa cu su oposicion di manteca, esta purba troce berdad cada biaha. “Mi ta kere cu ta bon pa kita biento fo’i bou hala di fraccion di MEP caminda cu ta bisa cu nan ta bay entrega keho, cu mi no a papia berdad den Parlamento y cu lo tin contractnan firma pa entre otro e Aruba Fashion Week”.


Splicando un biaha mas pakico el a pidi un reunion den Parlamento recientemente, el a bisa cu esaki tabata pa coregi un cantidad di añanan cu a bay robes caminda cu gobiernonan tabata haci gastonan sin aprobacion previo di Parlamento di Aruba, es decir, netamente pa cu e budgetrecht di Parlamento a pidi e reunion publico.

Pa loke a worde treci dilanti pa Sr. Booshi Wever, caminda cu e ta papia cu Minister Otmar Oduber den Parlamento a bisa cu no tin contractnan firma y cu el a bin cu prueba pa mustra cu hasta placa a bay di Banco Central pa Aruba Fashion Week, e titular di turismo a pone e puntjes riba e inan y aclarea e situacion di biaha, unda a mustra con bruha e fraccion di MEP y Sr. Booshi Wever ta.

Den e beleidsnota di Gobierno cu a worde entrega pa loke ta presupuesto di 2010 riba pagina 14 tin poni den e parti di Events Marketing como un di e eventonan the Aruba Fashion Week. Mester bisa cu e presupuesto aki a worde aproba den Parlamento na juni di e aña aki. Es decir, Fashion Week a worde pasa den Parlamento, a worde aproba den Parlamento cu 13 voto na fabor, pasobra fraccion di MEP a vota contra dje.

Mas tristo ta cu den e verslag numer 4 di Parlamento riba pagina 20 por mira preguntanan di e miembronan di fraccion di MEP y un di e preguntanan cu nan a haci ta “Riba pagina 13 ta papia di ‘events marketing’.

Cuatro evento ta worde papia di dje akiden: Aruba International Film Festival, Caribbean Sea Jazz Festival, Aruba Fashion Week y Aruba Extreme Sports Week na 2012”. Es decir, fraccion di MEP mes a haci preguntanan riba e Fashion Week!

Minister Otmar Oduber a mustra esaki pasobra “hopi biaha nan ta purba haya palo pa bati e cacho aki, pero en todo caso e cacho aki no ta worde permiti pa worde bati a base di mentira”.
Pa Aruba Fashion Week tin un contract, pesey el a worde paga y tin un contract pasobra el a worde aproba door di Parlamento!

Cu esaki por mira claramente e malicia cu tin patras di Sr. Booshi Wever y partido MEP cu ta purba troce berdad un biaha mas, lubidando cu papel ta skop duro, cual ta algo cu nan mesun lider ‘Casper the ghost’ a yega di bisa na varios ocasion.

Pa loke ta trata e pagonan, Minister Otmar Oduber a expresa enfaticamente cu tur cos a cana segun ley, segun reglanan, el a worde presupuesta, el a worde aproba y el a worde paga tambe segun e presupuesto cu tin pa e aña aki.

“Loke Sr. Wever ta bruha den dje y por ta mi tin cu splikele un biaha mas, pasobra e no tabatey durante tratamento cu tabatin siman pasa den Parlamento, loke nos no tabatin contract di dje tabata e resto di 7.5 miyon Florin cu lo mester a bay pa loke ta coops den e diferente mercadonan pa loke ta trata advertising, compra di propaganda”, Minister Oduber a duna di conoce.

El a agrega cu si Sr. Wever a puntra su amigo Sr. Edmond Croes el a compronde hopi bon con e cumpramento di propaganda ta funciona mirando cu e tin un compania di publicidad y e sa cu ora cumpra adelanta ta haya un balor mas halto pe.

Gobiernonan anterior y Sr. Briesen den Parlamento a admiti tambe cu e tabata paga invoicenan pa aña siguiente sin cu tabatin aprobacion di Parlamento. Esaki ta netamente loke e instancianan ta bisa cu ta contra ley.

“Sr. Wever tin cu bay busca un otro payaso pa e continua su circo, pasobra e payaso aki no ta esun cu el a pinta na comunidad di Aruba. Si e djis haci su huiswerk, si e djis a bay wak un rato con su mesun fraccion a haci pregunta riba p.e. Aruba Fashion Week cu ta den e presupuesto, den e beleidsnota y cu tin aprobacion di Parlamento, anto e ora ey e no a comete e disparate cu el a comete awe”, Minister Otmar Oduber a duna di conoce.

Finalizando el a conta cu siman pasa a sinta cu Algemene Rekenkamer, Raad van Advies, Wetgeving y Financien na mesa, caminda cu a constata cu di berdad tin un buraco den nos ley di comptabilidad caminda cu e tipo di transaccionnan aki no ta regla pa ley y a base di esey a sali un conseho nobo cu ta bay pa loke ta trata e obligacionnan cu tin pa otro aña.

- Advertisement -

2 COMMENTS

  1. Otmar semper ta cai den trampa, pa motibo di su envolvimento corupto den fondo di desaroyo San Nicolaas, unda e tabata un actor principal

  2. Hopi Tristo, pa nos wak con Booshi ta vocifera su tristesa den e dianan aki, nos sa cu e ta di luto y tambe su condicion di salud a bai hopi atras y ta hopi malo. Den Misa, Booshi sigur a tende pastoor bisa, a bira tempo pa reflexiona profundo den bo alma, y tambe e holo y temor pa Santa Oleo a commovi Booshi masha mes. Booshi a reflexiona berdad su caso den corte cu Pader Lampe y su hazañanan di pasado y e unico cos cu e por a saca for di su profundo memoria ta :Mentiras…Engaño..Parandaaaa. Mesora e la bin Parlamento y vocifera reflexion di su alma riba nos y husto Otmar a pare. Booshi no ta palabra hastro Otmar a usa contra bo, ta bo reflexion di bo pasado bo ta recordando, si Booshi ta corda con a yama Pader Lampe den Parlamento ? Asina bo no ta bai yega ni serca San Pedro. Ta mas cu cla, cu no ta Otmar so a saca e biento foi bou di bo hala, sino reflexiona, bai sosega, bo a bira swak, bati un arbeidsongeschikt y pasa bo resto di dianan cu bo sernan keri.

DUNA COMENTARIO

Please enter your comment!
Please enter your name here