Home General Tin diferente alternativa pa scapa fondo di pension publico

Tin diferente alternativa pa scapa fondo di pension publico

3
0
SHARE
- Advertisement -

alvinboekhoud1Sr. Alvin Boekhoudt di APFA:
“Franchise ta un di nan”
ORANJESTAD (AAN) — Nos redaccion a acerca e funcionario di APFA, señor Alvin Boekhoudt, relaciona cu nan encuentro di miembronan di OPPA, ayera mainta den Renaissance Conference Center. El a splica nos cu enberdad nan a haya un invitacion for di e miembronan di OPPA, cu tin hopi inkietud tocante e situacion di nan fondo di pension, y con ta sigui cune den futuro.
“ Nos tambe a haya ta bon pa papia cu nan, pa splica nan riba e situacion financiero di APFA, cu riba su mes no ta den bancarota, pero cu mester atende si e situacion financiero di e fondo di pension, cu no mester wak’e a corto plazo so, pero tambe pa futuro”, sr. Boekhoudt a indica.

Esaki kiermen, no pensa solamente riba e hendenan cu ta pension awor, pero den e hopi mas cu ta bayendo cu pension den futuro, y tin cu haci algo cu e areglo di PVL pa por asegure pa e generacionnan cu ta bin.

“ Y mas importante ta pa nan tin nan preguntanan, nan preocupacionnan, pa trece dilanti y pa nos por contesta te unda cu nos por tur nan preguntanan cu trankilidad, bao di e pensionadonan y duna nan e informacion cu nan ta haya ta necesario pa nan por tin”, sr. Boekhoudt a señala.
El a agrega cu no solamente e franchise por ta un solucion pero tin diferente variante.

alvinboekhoud2“ Un di nan ta e franchise, cu ta hopi comun den sector priva, tin tambe e hisamento di edad cu ta un discusion cu mester bin entre gobierno y sindicatonan, of por tin cambio den e sistema di un salario final pa un salario promedio, si PVL ta keda un fondo cera of bo ta hinca den dje e hendenan cu ta den SVb tambe den dje, pa e bira un solo areglo, y tin diferente proyecto pa un plan di recuperacion, pa segun loke pasa despues di un par di aña e pension ta ahusta of no, anto un combinacion di tur e variantenan aki por ta e solucion pa e fondo di pension publico por tin un futuro sigura pa nos pensionadonan y tambe e activonan cu ta trahando aworaki”, sr. Boekhoudt a indica.

Encuanto e hisamento di edad di pension, sr. Boekhoudt a señala cu esaki ta un discusion cu tin na Curacao awor, y otro paisnan tambe ta den e mesun situacion. Un di e factornan ta envehecimento cu ta aumenta (den cantidad y edad) cu ta afecta tur fondo, no solamente APFA pero SVb tambe ta sinti e consecuencianan y esaki ta algo cu no por cera wowo pe, pero mester enfrente y bin cu cierto cambionan.

Intencion ta pa sigui cu mas di e tipo di reunionnan aki. Sr. Boekhoudt a indica cu nan tin palabracion cu e sindicatonan por ehemplo awe APFA ta reuni cu SEPPA, y mañan lo sigui cu e dialogo social pa informacion, y asina tin otro sindicatonan pendiente pa nan worde yama pa informacion.

“ Nos por ripara cu ora nan haya informacion nan ta compronde e situacion y no solamente loke nan ta scucha eyfo, pero for di e doño di curpa tambe cu ta APFA, cu por splica kico e situacion ta y kico ta e proposicionnan cu nos tin pa yega na un solucion conhuntamente cu gobierno y e sindicatonan”, el a agrega.

Finalmente señor Boekhoudt a indica cu na Juli di aña 1990 e prome comision a worde lanta pa medio di un decreto ministerial na APFA, pa studia e problema aki, y nan tin 20 aña consecutivo cu nan ta haciendo esaki, pero e no ta un solucion facil pa ningun partido, y el a worde cada bez poni den futuro y awor momento a yega pa tuma un solucion, pasobra e no por sigui asina.

- Advertisement -

DUNA COMENTARIO

Please enter your comment!
Please enter your name here