Home Politica Analisis politico…… Booshi Wever

Analisis politico…… Booshi Wever

3
0
SHARE
- Advertisement -

ORANJESTAD (AAN): Poco dia pasa Booshi Wever ta un di esnan di MEP cu a grita palabra malo y ofende hende manera ta su costumber y a haya apoyo di su coleganan di Staten. Simplemente esey ta e manera di hiba politica di e dirigentenan di MEP y nan ta haci esaki concientemente. Tur e miembronan di Staten di MEP sa masha bon kico Booshi a haci durante e periodo cu e tabata ministro pero pa nan nada di esaki ta descualifica Booshi como dirigente di e partido.
Al contrario! Hustamente un record manera esun di Booshi ta e credencialnan pa ta den top di MEP. Nos a yega di trece padilanti cu pa bo por falsifica un diploma pa haya trabao den gobierno basa ariba e diploma aki bo tin un trastorno mental cu ta algo definitivo. E ta un anomalia sicico cu no ta algo cu ta cura. E ta parti di bo personalidad y ta keda cu bo resto di bo bida.

Awo e mesun Booshi aki tabata amigo grandi di e difunto cu a horta miyones na Landslaboratorium. Nan dos regularmente tabata bay hunto den yate pa Punto Fijo pasa dianan gastando miles di Florin cu tabata imposibel cu e salario di Booshi of di e difunto.

E hefenan di Landslaboratorium den varios ocacion a alerta Booshi cu tin iregularidad pisa ta tumando luga na Landslaboratorium bao di e difunto y cu esaki probablemente ta costando nos pais hopi placa.

Ni cuanto e hefenan di Landslaboratorium a trata di haya atencion di Booshi e tempo ey ministro di salubridad publico bao cual Landslaboratorium tabata cay e reaccion di Booshi tabata di bira cara y wak otro banda. Den e caso aki Huez den su sentencia di e difunto amigo di Booshi a dicta cu e berdadero culpable di e malversacion di miyones di Florin no a worde persigui.

Indicando cu tabata e ministro cu a worde alerta claramente no a haci nada y door di esaki a bira e complice den e robo di miyones.

Un sentencia unico cu mester a worde gara door di ministerio publico y worde investiga intensivamente pero lamentablemente e ministerio publico tabata cana na man di e gobierno di MEP y no a h aci nada.

Awo ta e mesun Booshi aki ta grita acusa hende drechi di tur sorto di cos malo sin cu e ta realiza cu su beurt pa worde investiga profundamente a yega. No por ta asina cu miyones di placa di pueblo a desaparece bao di e ministro concerni horta door di un amigo di tur dia di e ministro y e ta bay den buki di olvido.

A worde anuncia siman pasa cu e investigacion di e corupcion na Dump a inicia. Esaki ta un caso grandi cu tambe mester worde investiga y mester mira cu e sumanan grandi cu a bay perdi pa motibo di e actuacion di e ministro por worde cobra back di e ex ministro.

Pero esaki no kier meen cu e caso di Landslaboratorium mester keda un banda sin worde investiga pa motibo di falta di personal. LandsRecherche a mustra cu nan ta parce hopi partidista y nan a worde guia door di procuradornan general cu tabata haci todo por todo pa no investiga e criminalnan di MEP.

Den e rapport di departamento di siguridad di Hulanda a worde enfatisa cu no por spera nada di e procurador general cu a worde nombra door di Rudy Croes pasobra e ta cana na nan man.

Awo cu algun luna a pasa y e gobierno nobo a haya tempo pa instala su mes y laga e sistema hudicial cuminza fuciona manera mester ta nos ta spera cu berdaderamente e crimennan di pasado lo worde atendi na un manera serio y cu no mag laga e mesun ministerio publico cu ya caba a mustra su parcialidad stroba esaki.

E caso di Landslaboratorium mester haya un follow up dentro di corto tempo pa pueblo mira cu no tin ningun intencion di laga esnan cu a causa nos pueblo dañonan grandi sali liber. Booshi Wever tabata e ministro cu aunke e a worde spierta cu su amigo probablemente tabata envolvi den ladronicia miyonario na Landslaboratorium e no a haci nada.

- Advertisement -

DUNA COMENTARIO

Please enter your comment!
Please enter your name here