Home Politica Ademas Di Tiara Air, Tin Espacio Pa Mas Aerolinea Nacional

Ademas Di Tiara Air, Tin Espacio Pa Mas Aerolinea Nacional

1
0
SHARE
- Advertisement -

Segun Minister di Labor, Turismo y Transporte:

ORANJESTAD (AAN) — Varios pregunta a worde lanza na Minister Otmar Oduber, durante e conferencia semanal di prensa di gobierno, mayoria rond di e tereno di aviacion pero tambe el a worde puntra tocante Enseñanza pa Empleo.

E mandatario a haya pregunta relaciona cu un posible linea di aviacion nacional, pa cual ya caba tin un grupo ta reclutando piloto.

Minister Oduber a señala cu e ta gusta trece cosnan dilanti ora nan ta confirma y den un estacion unda ta bon pa trece informacion dilanti.

“ Den e plan di maneho di ministerio di turismo den e gobierno aki, ta bon cla poni cu nos ta kere cu mester di mas partnernan estrategico posible. KLM ta un di nan, American y Continental, entre otronan tambe.

“ Nos tin un aerolinea nacional aworaki cu ta Tiara Air, y gobierno a mustra riba e hecho cu nos ta bay duna tur sosten posible na e grupo aki, caminda cu por, pasobra e ta un grupo di Arubianonan tambe, cu a demostra di tin un derecho di existencia.

“ Pero den e plannan cu gobierno tin, nos por mira tambe cu tin necesidad di amplia e flota aki, pa por yega na mercadonan un poco mas leu, cu nos por mira cu nan por crece.

“ Un di nan cu mi kier menciona na e momentonan aki, ta Brasil. Nos ta sinti cu e ta un mercado sumamente potencial pa Aruba. Banda di Europa, mi ta kere cu Brasil hunto cu Argentina, Chile, pero mas tanto Brasil, ta un mercado cu nos ta bay concentra hopi durante e siguiente cuatro añanan, y den e cuadro ey nos a conversa, y den e plan di gobernacion nos a pone cu tin espacio pa un of mas aerolinea nacional, tanten cu nan ta cumpli como un bon partner den e destinacion, y berdad ta cu tin interes na e momentonan aki di diferente grupo, no solamente uno, cu tin un interes y en particular un cu ta basta leu caba y mi ta spera cu den e lunanan nos dilanti, pasobra no ta un proceso facil, nos lo por haci anuncio un bez cu nos yega un tiki mas cerca di e partnership aki, entre gobierno y sector priva”, e mandatario a comenta.

E no a menciona nomber di e partnership aki, pero si a admiti cu “Aruba Airlines” ta un di nan cu actualmente ta bezig. Pero ta considera prudente pa warda prome cu duna mas dato, aunke e ta kere cu pronto lo por tin otro celebracion manera di dialuna cu KLM a bolbe bin Aruba.

E mandatario a subraya cu e tin informacion for di Departamento di Aviacion Civil, cu en todo caso, tin un di e gruponan interesa pa lanta otro aerolinea local, cu ta den un proceso basta acelera, y cu kizas pa meymey di e aña aki, vuelonan por cuminza tuma lugar.

- Advertisement -

DUNA COMENTARIO

Please enter your comment!
Please enter your name here