Home Politica “Korsou por a siña hopi mas for di e trayectoria pa Status...

“Korsou por a siña hopi mas for di e trayectoria pa Status Apart di Aruba”

2
0
SHARE
- Advertisement -

miembroantillasFuturo miembro di Staten di Antiyas Gassan Dannawi:
ORANJESTAD (AAN) — DIARIO a entrevista e hoben Gassan Dannawi, ken na Maart proximo ta bay forma parti di Staten di Antiyas, den fraccion di partido MAN. Gassan a mustra su interes pa bin Aruba y ser conoci cu e miembronan di nos Parlamento, y intercambia idea cu nan, locual ta muy posible lo tuma lugar pronto. Seguidamente e entrevista realiza cu Gassan Dannawi. DIARIO: Kico a motiva Gassan pa subi arena politico, y na ki momento esaki a sosode?
Gassan: “Esaki a sosodé na 1994, pues 16 aña pasa, pasobra mi a scoge entre bay for di Kòrsou òf duna un man pa yuda cu hubentud, pues cu futuro di Kòrsou, despues di e promé referèndum”.

DIARIO: Esaki ta e di cuatro biaha, si nos no ta hera cu Gassan ta subi un lista politico. Con Gassan a experiencia e otro biahan riba un lista?

GASSAN: “E prome tres biahanan tabata cu Partido Laboral di Errol Cova y esaki ta e promé biaha ku Partido MAN òf Lista di Kambio, pero cada experiencia ta uno riba su mes, pero esun aki tabata mi mehor experiencia tòg te ainda, aunke e proménan tambe ta keda semper den mi memoria”.

DIARIO: Ki ta Gassan su ideologia y con, ocupando un stoel den Staten, tin pensa di yuda e pueblo di Curacao?
GASSAN: “Bon, mi ideologia ta uno social, pues uno di Hustisia Social, caminda mester por crea mas oportunidad pa cada ciudadano por desaroyá su mes di forma igual den su komunidad. Hunto cu esey, Gobernacion mester por sòru pa un reparticion mas husto di entradanan. Ami lo representá pueblo di un forma transparente caminda cu pueblo su necesidadnan por haya oido, y cu e tin e confianza cu esakinan lo haya e atencion necesario pa wòrdu trata”.

DIARIO: Kico ta nifica pa Gassan, forma parti di oposicion?
GASSAN: “Oposishon tin e tarea sumamente importante di pone presion y ehercé mas contròl riba e coalishon y su Gobièrno pa interes di pueblo por keda mihó sirbi, aparte di lo yuda den e proceso pa disolvé Antia Hulandes”.

DIARIO: Kico kiermen pa Gassan hiba un oposicion fuerte y alavez imparcial y sano?
GASSAN: “Pa mi persona un oposicion fuerte ta nifiká ser efectivo y di enfoca riba issuenan cu ta di interes general, saliendo si for di un punto di salida imparcial y sano, pero cu ideologia di partido tòg den mente”.

DIARIO: Con Gassan ta mira e hecho cu Curacao lo bira un pais cu su status apart?
GASSAN: “Ta loke pueblo di Kòrsou a scoge pe den e referèndem di 2005, pero ainda tin algun punto di desacuerdo cu Hulanda riba cierto aspektonan di principio, pues aunke no kontento cu e forma cu coalicion a negociá nos Status Aparte cu Hulanda, tòg nos tambe tin e máximo deseo pa yega na e Kòrsou Autónomo den Reino, lo mas rápido posibel, pa nos por sigui cu emancipacion di nos pueblo”.

DIARIO: Kico ta e bentaha y kico e desventahanan cu esaki por trece cune?
GASSAN: “E bentahanan ta hopi, pasobra nos lo por enfoca mas riba nos mes asuntonan, tambe nos mes entradanan y capaciidadnan, y sigur riba nos mes identidad como pais; desventahanan ta e puntonan cu nos no ta di acuerdo ku nan, pasobra Hulanda cu yudansa di e coalishon a sa di mara nos tòg ku e otro islanan riba cierto aspecto”.

DIARIO: Con Gassan ta kere cu un relacion den e futuro estatal di Curacao mester ta tanto cu Hulanda, como cu Aruba y cada un isla cu a forma parti di Antiyas? Con Curacao ta mira Aruba como e prome isla cu a haya su status apart?

GASSAN: “E relacion mester ta uno basa riba rèspèt mutuo y igualdad, pasobra nos ta partnernan igual den Reino; e hecho cu nos como isla chikí ta mas debil cu Hulanda, no ta nifiká cu nos mes no por. Hulanda no por sa mihó kico ta bon pa nos, pues nos mester haya otro na caminda si pa nos pueblo por haya loke berdaderamente e merecé. Nos partido no por ta kontra di Hulanda nunca, solamente nos ta pro Kòrsou y nos lo sigui lucha pa su emansipacion husto.
“ Kòrsou por a siña hopi mas for di e proceso y trayecto di Aruba, pero pa interes polítiko di cierto partido den e coalishon actual, nos pais no a probechá suficiente for di esaki, cu e consecuensia cu nos a pèrdè mas di nos autonomia pa motibo di a negoshá robes”.

DIARIO: Cual ta e grupo meta di Gassan: esta e hubentud, e grandinan, e famia en general?
GASSAn: “Claro cu mi persona ta representá tur hende, pero un prioridad sigur lo ta nos hóbennan pa motibo cu nos tin cu bay traha riba un Kòrsou Nobo, pues nos mucha y hóbennan mester haya mas atencion y dedicacion, di parti di nos gobernante, representantenan; nos mester crea mas oportunidad y perspectiva pa nan futuro”.

DIARIO: Cual ta e tereno unda Gassan ta mira cu mester trece mas mehoracion, na Curacao, como pais?
GASSAN: “Costo di bida ta demasiado halto, nos enseñanza ta den crísis y economia ta drai pa un grupito so; banda di tur esakinan, tin basta corupcion y hopi mal gastamento di placa. E vision necesario pa unda nos kier bay cu e Kòrsou Nobo no tey, no ta gobernando aki nan, solamente ta administrando e pais aki”.

DIARIO: Con anto, Gassan mes ta mira e desaroyo economico-financiero di Curacao, mescos e aspectonan social, cultural, educativo y salud?
GASSAN: “Riba diferente tereno tin problema, pasobra no tin vision, no ta traha preventivo, mas bien ta traha adhoc, pues ta purba di tapa buraco aki aya sin niun clase di vision y/òf planificacion”.

DIARIO: Kico Gassan ta expect pa su futuro como politico?
GASSAN: “Mi ta kere den nos hóbennan, pues como un hóben den política mi ta kere cu ainda mi tin hopi pa ofrecé na comunidad. den sentido cu mester purba haci cosnan diferente den e pais aki, anto p’esey mester di ideanan nobo y inovativo, mester di cambio, cambio di mentalidat y actitut, nos tin cu bira mas productivo y efektivo, pasobra nos tin hopi potencial pa por crece”.

DIARIO: Con importante ta pa Gassan e relacionnan di Curacao cu otro paisnan den Caribe, America Latina, etc?

GASSAM: “Nos ta forma parti di Caribe, pues nos mester haci mas na esey. tanto riba tereno social y cultural, como riba tereno económiko. Nos tin ku firma mas comvenio y acuerdonan di cooperashon cu Caribe, anto uza e region aki mas na nos beneficio, e.o. pa servicio, turismo, producto, comersio, telecomunicacion, transporte, enseñanza y deporte”.

DIARIO: Kico mas Gassan kier a agrega na e entrevista aki?
GASSAN: “Mi kier gradicí DIARIO pa e oportunidad special aki, pa por a trece mi opinion dilanti riba tur loke ta acontesé riba e tereno polítiko aki na Kòrsou, na mes momento tambe mi kier extendé un saludo fraternal y caluroso na pueblo Arubano, e pueblo ruman. Mi lema tambe ta conta pa nos relacion: “Ban pa un polítika nobo, skoge positivo, skoge pa cambio, scoge pa Futuro”!

- Advertisement -

DUNA COMENTARIO

Please enter your comment!
Please enter your name here