Home Hudicial Juffrouw di School ta comparti su experiencia cu “Guillain Barre”

Juffrouw di School ta comparti su experiencia cu “Guillain Barre”

1
0
SHARE
- Advertisement -

Posiblemente, e ta e prome caso na Aruba:
ORANJESTAD (AAN) – Na aña 1975 tabata tin, posiblemente, e prome caso di Guillain Barre Syndrome aki na Aruba. Su caso nunca a bin den publicidad pasobra e dama aki, cu ta un juffrouw di school hopi stima, por cierto, nunca a pensa di divulga esaki. Den su caso, e motibo no ta asocia na cuminda manera galiña, pero el a haya e malesa despues di parto di su prome baby. E tempo ey e tabata un hoben di 23 aña, y tabata traha den un school na San Nicolas.
Locual a sosode cu e juffrouw ta hopi lamentable, el a pasa den duro pa un tempo largo y nos gradici e hopi, cu el a acepta di comparti su caso cu nos lectornan.

MAL PRACTICA DURANTE E PARTO:

Juffrouw a conta nos cu despues cu el a haya su prome yiu, el a pasa den un dia di dolor pisa y el a saca hopi sushi di paden. E tabata un parto dificil y e mucha a muri despues ya cu el a nace cu daño cerebral.

E practica cu e docter a haci cune ta uno sumamente peligroso) cu hasta el a worde prohibi mundialmente). El docter a pone su elbow na su rebchi y manda su barica te su lomba. Door di esey, el a haya complicacion cu su gaalblas. Na Aruba nan no por a descubri unda su gaalblas a bay. Na Colombia nan a descubri cu el a cay patras y a cuminza daña paden te afecta e dama su tripa. Durante e aña ey, e juffrouw no por a traha mas largo cu tres luna.

Como cu e malesa aki ta relaciona cu cualkier sorto di infeccion, por a asumi cu el a haye como consecuencia di loke a sosode cune despues di e parto. Pero na momento cu el a bira malo, di anochi pa mainta, e no a sinti nada particular, y tampoco el a come galiña, cu ta un di e posible causanan.

CON E MALESA A DESAROYA:

E ta corda cu riba un diasabra el a subi cama drumi bon, pero pa su diadomingo mainta ora el a lanta el a sinti cu su rudia ta zaak bay abao.

El a bay traha lechi pa e baby, pero su man no tabata tin pulso, despues su lenga a bira pisa, y ora cu el a bay skeiro su cabey e no por a tene cu su man, y e skeiro a bay cay otro banda di e camber.
E juffrouw a sigui relata cu ora su famia a ripara cu el a bira mas malo nan a core hibe docter na warda cu a kere ta circulacion y como cu e no por a papia pa splica su mes bon, el a mande busca pildo pa circulacion na botica y mangel pa chupa, pa garganta.

Nan a bay cas y su mama a bise cu e no por bebe pildo sin desayuna. El a bay traha lechi pe, y ora el a bebe esaki el a sali via di su nanishi bek, y e absolutamente e no por a guli.

E ta corda cu el a drumi henter e dia ey, pero pa su mainta siguiente e no por a cana. Su famia a cargue pone den auto, y nan a hibe cerca e docter cu a yude den e parto. El a haya prioridad riba tur otro pacient, y e docter a bay coi un angua primie un tiki riba su barica, pero juffrouw no a sinti net nada.

Despues el a bati riba su rudia pero e no tabata tin refleho. Su mama a conte cu nan a bay docter caba diadomingo, anto el a puntra kico e docter aki a dune. E docter a bay wak den un buki grandi te haya informacion riba e remedi y el a bise pa sigui cune.

Ora juffrouw a bise cu e no por guli, e docter a bise keda sin guli y bise pa busca straw den refresqueria pa bebe refresco y cu asina e ta bay bebe. E di cune cu e no por cana, e docter a conteste cu e ta keda sin cana y cu e ta bay drumi. Juffrouw a bise cu tampoco e por papia (e tabata perdiendo habla e momento ey) y e docter a bise cu e ta keda sin papia.

Despues el a bin compronde cu si el a haci caso y bay drumi e malesa lo a apodera di dje completamente.

Juffrouw a bin cas y via un señora bisiña di su mama cu tabata na docter ora el a drenta carga, y ken a bay puntra e docter kico ta pasa e pacient ey, nan a haya sa cu su condicion tabata di gravedad y cu e no por compronde su malesa y e no por yude.

DIAGNOSTICO NA COLOMBIA:

No obstante, cu su docter a dune cita bek pa diahuebs, pa diamars, cu ayudo di su famia, el a viaha rumbo pa Colombia. Den rolstoel el a bay. Na Colombia, na prome instante nan a pensa cu el a haya un derame cerebral, pero nan a haci test y no a haya sanger aden.

Docternan a reuni pa studia e caso y nan a bin descubri cu ta Guillain Barre e tin. Na Colombia e tabata haya terapia dos biaha pa dia, y angua pisa. Ora cu el a sali for di hospital e no tabata tin refleho. El a bin compronde cu e no tabata tin gevoel den su dedenan ainda.

Pero nan di cune pa bolbe Aruba, pasobra e gastonan tabata subiendo hopi, apesar cu e famia a bay bon prepara.

Aya nan a bise cu e tin suerte, cu ta un milagro a sosode cune cu el a sali bin bek Aruba, pasobra na Colombia varios hende a muri di e malesa aki.Nan a consehe pa na Aruba sigui controla su reflehonan.

Ora el a bolbe Aruba el a hera di perde su trabao, pasobra el a bira malo diripiente y e Hefe kiermen cu no ta docter a mande afo. El a bay bek na docter pidie si e por firma e papel pa e haya su gastonan paga bek, e docter a bise cu el a diagnostica Guillain Barre.

Juffrouw a bise cu ningun momento esaki a sosode y cu el a laga sa cu e no ta compronde su malesa. Juffrouw a bise cu e ta bay corant, y mesora e docter a firma e papel cu e por a declara esaki, y scapa su trabao y nan a mira con grave su estado tabata.

A tarda pa juffrouw recupera. Pa un tempo e no por tabata den un multitud pasobra e tabata haya e sensacion cu el a bay cay. Despues, a keda un tempo cu den cas, papiando gewoon cu su mama, e tabata cay dal abao.

Ultimo bez cu el a cay tabata na dunando les na school basico Washington. El skeur su menisco y a kibra su pols. El a worde opera y despues di esaki el a bisa docter cu e ta sinti cu parti patras di su pia ta manera ta lock ora e cana. E docter a bise cu e mester bay neurologo, pasobra e tin spiernan cu a sufri daño.

Pero e no bay mas y a keda cu su daño pasobra el a pasa den hopi cos den man di docter durante e añanan luchando cu “Guillain Barre” cu e no kier a mira docter mas.

A tarda hopi aña pa Juffrouw recupera bon. Pa un tempo e no por a bisti hilchi halto mas pasobra e tabata cay. Aworaki e tin varios nervio cu a keda debil, pero el a siña biba cune.

Den nos siguiente edicion nos lo elabora riba dos caso mas. Un di nan ta e caso cu dr. Vallejo a detecta mesora y e pacient a restablece su salud, y un otro persona cu te ainda ta sufri e consecuencianan di e malesa aki.

- Advertisement -

DUNA COMENTARIO

Please enter your comment!
Please enter your name here