Home Hudicial Fiscal a haya hopi straño con facil hende por uza credit card...

Fiscal a haya hopi straño con facil hende por uza credit card di otro

1
0
SHARE
- Advertisement -

creditcardORANJESTAD(AAN): Recientemente e Colombiano Jair D.A.C di 19 aña aparece dilanti di huez, door cu el a wordo acusa di ladronicia cu violencia di credit cardnan y/of otro propiedadnan di un persona riba 29 di Mei 2009.E violencia y/of menaza cu violencia tabata encera cu el a mustra e persona un cuchio, a bise pa e keda trankil y no grita, a mare, a pone un paña den su boca y a bise cu el a wordo manda pa un hende pa mate.A.C. ta wordo acusa tambe di, conhuntamente cu otronan, ladronicia di un cantidad di placa y/of otro pertenencianan di negoshinan den e periodo di 29 di Mei 2009 te 2 di Juni 2009.
E ta wordo ademas acusa di, conhuntamente cu un otro of otronan, a usa ATM-card(s) y/of creditcard(s) cu e intencion pa lanta placa y/of paga pa cuminda y otro propiedadnan di negoshinan y/of un persona den e periodo di 29 di Mei 2009 te 2 di Juni 2009.

Tambe e ta wordo acusa di a cumpra, entrega, bende of usa paña y otro cosnan di cual e tabata sa cu nan ta directamente of indirectamente procedente di crimen den e periodo di 29 di Mei 2009 te 2 di Juni 2009.

E acusado a declara na polis cu el a yega Aruba riba 25 di Mei cu boto for di Colombia, manera el a yega di hasi na diferente occasion.

E kier a busca un trabao y na dado momento el a pensa pa tuma contacto cu un persona cu lo por a yude haya un trabao. El a bay na cas di e persona na Savaneta, pero e persona no tabata tey.
Ora cu Jair tabata cana bay, el a sinti cu e mester a ay baño y como cu el a wak un porta di e cas habri, el a dicidi di drenta pa bay baño.

Huez a bisa e acusado cu ta hopi straño cu e ta djis drenta e cas sin permiso y uza baño di hende.
Jair a sigui bisa cu como cu e no a wak un baño, el a subi pa otro piso di e cas y eynan el a wak un baño.

Sinembargo el a tende un cacho y a wak un mucha muher chikito y el a bay sconde pa nan no wak e. Na dado momento el a ripara cu un pickup a yega na e cas y el a dicidi di drenta cushina y coi un cuchio.

Huez a haya esaki tambe straño. Jair a bay sconde den un ‘Walk in closet’ y na dado momento e doño di cas a drenta den e closet. Segun e acusado el a pone dos camisa rond di su cara y a para tras di e doño di cas cu e cuchio den man y a bise pa e no grita.

E persona a puntre si ta placa e kier, pues cu nan por bay bancomatico pa busca placa.
Jair e ora ey a bise cu e no por bay ningun caminda, pasobra tin hendenan a mande pa mate.
E acusado a splica cu no tabata su intencion di horta placa, pero ora e homber a puntre si e kier placa, el a dicidi di purba haya placa, pasobra e no tin trabao.

El a pidi e homber pa su pin code y e homber a dune, pero e mester a busca e cartera den auto.
El a mara e homber y el a coi auto di e homber cu cartera y tur y a bay. Jair a purba pin code, pero e number no tabata corecto.

Den e cartera sinembargo tabata tin diferente credit card y Jair a dicidi di cumpra diferente articulo, incluyendo pana.

E tabata dune e credit card y firma y facilemente e tabata haya tur cos.
Te hasta el a duna un amigo un di e carchinan ey pa e tambe cumpra cos.
Ora e carchi a stop di traha, el a stop di cumpra cos.

Fiscal a bisa cu e tipo di actonan criminal aki ta loke ta pone hende pone heki y tur sorto di alarma na nan cas. Ni di dia cla bo cas ta sigur, segun fiscal. Fiscal a bisa tambe cu e ta haya straño y remarcable con facil ta pa hende uza credit card di otro hende, sin cu esaki ta wordo controla debidamente.

Fiscal a exigi un castigo incondicional di 4 aña.
Huez lo duna su veredicto dia 27 di November.

- Advertisement -

DUNA COMENTARIO

Please enter your comment!
Please enter your name here