Home General F.D.A cu peticion pa diabeticonan bin forma parti di e fundacion!

F.D.A cu peticion pa diabeticonan bin forma parti di e fundacion!

14
0
SHARE
- Advertisement -

ronweverlaboratEntrevista exclusivo cu drs. Robert Wever, presidente:
ORANJESTAD (AAN) – Ayera merdia, DIARIO a tene un entrevista cu drs. Robert Wever, ken actualmente y di manera temporario, ta Presidente di Fundacion Diabetico Arubano (F.D.A), cu como instancia cu pa hopi aña ta trahando pa comunidad, ultimo temponan a keda pafo di publicidad. Drs. Wever a menciona cu durante e ultimo cinco añanan e fundacion a keda no mucho activo, aunke nan tabata organiza diferente evento relaciona cu diabetes, pero posiblemente e publico no a ripara esey hopi.
Un di e aspectonan cu nan a traha riba dje ta duna educacion na e proveedornan di cuido, manera docter, specialista, etc., riba e materia di Diabetes.

“ Nos ta haciendo algo pa yuda e pacient diabetico cu e parti di cuminda, esta ‘cushina diabetico’ pero lamentablemente e delaster lunanan nos ta un tiki keto riba dje. Y tur aña, riba e fecha 14 di November, cu ta e ‘Dia Internacional di Diabetes’ nos tabata tene nos caminata y e aña aki, atrobe, nos ta haci esey”, drs. Wever a menciona.

Drs. Wever a reconoce cu durante e dos ultimo añanan F.D.A no tabata biba un bida hopi pafo y no mucho activo, y e tin di haber tambe cu cambio den e directiva.

“ Delaster tres lunanan mi a tuma over, temporalmente, e presidencia di e fundacion, pa asina nos bay enfoca riba kico nos kier pa Fundacion Diabetico Arubano. Mi ta kere cu e fundacion por tin un rol masha importante na Aruba pa e bienestar di nos pacientnan diabetico, pero mi ta kere cu ta hopi importante na e mesun momento pa e pacientnan diabetico mes, involucra nan mes den e fundacion aki, cu ta parti di nan y no solamente parti di e profesionalnan cu ta duna cuido”, drs. Wever a subraya.

DIARIO a puntra drs. Wever con a bay cu e registracion nacional di diabeticonan, cu ta un di e proyectonan cu F.D.A tabata tin algun aña pasa, unda inclusive nan a pone un number di telefon disponible pa e personanan yama y inscribi.

“ Mi sa mucho bon kico a para di dje. Mi sa cu den pasado tabata tin e deseo pa registro, pero na e momentonan aki tin hopi diabetico, y actualmente tin hopi proveedor di cuido cu ta tene nan bezig cu diabetes. Nos tin un poco miedo cu e proveedornan di cuido ta traha poco banda di otro, di moda cu eigenlijk un bista total di kico tin aworaki, cu e pacientnan diabetico ta un tiki leu ainda”, drs. Wever a comenta.

Aworaki tin institucionan manera Club Diabetico Arubano, Wit Gele Kruis, INSAM cu nan centro diabetico.

Drs. Wever no por a duna nos detaye di e tarea di e centro diabetico, cu por cierto ta ubica na Wayaca, pero e tin entendi cu e ta un centro pa diabeticonan di prome linea, cu ta parce cu tin e tarea pa yuda e docternan di cas, den e tratamento di nan pacientnan diabetico.

“ Banda di esakinan tambe tin Hospital dr. Horacio Oduber cu ta bay bin cu un proyecto pa diabeticonan. Pues, tin hopi actividad, tin hopi hende cu ta tene nan mes bezig cu e parti di Diabetes, y aworaki hunto cu CEDE-Aruba cu ta un organizacion cu ta bezig cu NGO’s, Club Diabetico y Fundacion Diabetico, at least ta sinta aworaki, regularmente, hunto, pa purba di yega na un solo ‘approach’ pa cu e pacientnan diabetico, y mi ta kere cu na Aruba mucho hende ta bezig cu mesun cos, sin cu ta coordina esaki”, drs. Wever a señala.

DIRECTIVA:

E Directiva di Fundacion Diabetico Arubano ta consisti aworaki di Laura Geerman, cu ta un enfermera di Hospital specializa den Diabetes y ta fungi como Tesorera; Angeliquie Salsbach cu ta un Dietista tambe trahando na Hospital cu ta ocupa e posicion di Secretaria, y Drs. Albert Wever, cu actualmente ta e Presidente.

“ Pues, por ripara cu e base ta hopi small pasobra nos a perde diferente miembro di e Bestuur pa diferente motibo, pero loke nos ta haci aworaki ta dos cos concreto: pa prome, dia 14 di November cu ta diasabra otro siman, pa 5.50’ or di atardi, nos tin un canamento saliendo for di INSAM unda e ta caba tambe. E caminata aki ta habri pa tur hende y ta gratis. Y nos ta pidi, vooral e Diabeticonan pa participa, pasobra movecion pa e diabeticonan ta hopi importante”, drs. Wever a señala.

E di dos meta cu FDA tin, ta pa e Diabeticonan mes forma parti di e fundacion.
“ Como profesional bo por pensa mil y un cos, pero no ta bo ta e diabetico; no ta abo tin cu cana tur atardi, ni cambia bo estilo di bida, cu ta algo hopi dificil.

“ Mi ta hopi interesa pa trece e diabeticonan den nos fundacion pa yuda nos mehora e organizacion. Esey ta e dos actividad cu nos ta bay concentra e lunanan nos dilanti riba dje, pa trece hendenan den nos fundacion cu por yude crece”, drs. Wever a subraya.

Un aspecto cu el a haci enfasis y cu hendenan diabetico den e fundacion por yuda concientiza nos pueblo ta, cu e famia di e persona diabetico mester ta parti integral den e cuido. E persona diabetico mester di e sosten, comprension, motivacion y ayudo di su famia pa e por hiba un mehor estilo di bida, incluyendo canamento, uzo di su remedinan, y e nutricion adecua.

DIABETES Y SOBREPESO:

Un di e factornan cu ta hunga un rol den e aumento di cantidad di hendenan diabetico na Aruba ta sobrepeso y falta di actividad. Drs. Wever a señala cu hopi di nos hendenan no ta cana, nan ta bay cu auto djey pa e Chines, y tin biaha pa cumpra cosnan cu nan no mester cumpra.

“ Cuatro di cada cinco Arubiano tin sobrepeso, loke ta hopi. Y e falta di actividad, cana atardi y uza e pianan mas cu uza auto den combinacion cu cuminda cu no ta mucho beneficioso, ta trece cune cu Diabetes na Aruba ta bastante halto.

Nos mes ta calcula cu e cantidad di diabeticonan ta core alrededor di 10 mil hende, di cual 4 mil ta activo cu nan malesa, esta cu ta tuma remedi of ta bezig cu tratamento. Esey kiermen tambe, cu tin un grupo casi mes grandi cu no ta ricibiendo tratamento, cu no ta activamente bezig cu nan malesa”, drs.Wever a señala.

Den un articulo apart DIARIO ta sigui elabora riba e entrevista aki cu drs. Robert Wever, Presidente di Fundacion Diabetico Arubano.

- Advertisement -

DUNA COMENTARIO

Please enter your comment!
Please enter your name here