Home Deporte San Nicolaas Braves a gana Sluggers y Indians a derota Oranjestad...

San Nicolaas Braves a gana Sluggers y Indians a derota Oranjestad BBO

2
1
SHARE
- Advertisement -

baseball1ORANJESTAD (AAN)— Durante e siman a efectua dos partido candeloso relaciona cu e campeonato di baseball AA 2009 dedica na Robbie Briesen y Juvenal Nava.Braves y Sero Preto Stars a forma un solo equipo di AA e aña aki pa asina fortifica e parti di pariba di brug. E campeonato di e aña aki lo conoce varios partido interesante ya cu equiponan ta mustra cierto balance entre nan.

Equipo di Braves/Stars a pica dilanti den e prome cuater inningnan pa bay ariba 5-1, pero den di seis inning Sluggers a empata e partido y den di siete Jason Albus a conecta un bataso grandi den profundo di right center cu dos na base pa hiba su equipo ariba cu bentaha di tres careda.

Braves/Stars sin embargo den e siguiente inning a bounce back ora Jethrow Mohamed a conecta homerun y Joel Maduro a yega base cu su di tres hit di e partido, Melano Albertus a yega base mediante base por bola pa Percho Ansano conecta un doblete den rightcenter pa empuha dos careda mas.

Ansano a anota e careda di gana ora Charles Hooker a conecta hit.Score final 9-8 pa Braves/Stars.ATCO Indians ta gana su di dos partido despues cu e equipo di Oranjestad BBO a percura pa hopi dolor di cabez pa e peloteronan bou mando di Joy Orman.

Oranjestad BBO sin duda e aña aki cu un equipo totalmente cambia por bay bira e sorpresa di e campeonato 2009. Cu yegada di Jarrold Tromp ex-Valero cu a habri ayeranochi pa Oranjestad equipo a haya un bon refuerzo den su staf di pitcheo.

baseball2Esaki el a demostra ayeranochi dominando e fuerte bateria di ATCO Indians pa cinco inning largo. Tabata Oranjestad cu tabata dilanti cu score di 4-1, pero Jarrold a mustra senjanan di cansancio den di seis inning y correctamente papa Panneflek a saca Jarrold for di e partido.

Den conversacion cu manager Panneflek el a declara cu e prestacion di su equipo tabata satisfactorio y no ta su intencion pa maluza Jarrold pa despues yora malai.

Nos tin basta wega mas pa hunga y Jarrold mester tey pa yuda e equipo pa e equipo duna mihor resultado cu aña pasa ora nan a drenta AA como debutante.Sin duda nos ta kere cu e equipo aki lo crece y mirando e hecho cu ya caba nan farm-system ta funcionanado mester tene bon cuenta cu e organizacion aki.

ATCO Indians a cuminza corta ventaha den e di seis inning y a empata esaki.Den di siete inning ATCO a decidi e partido cu un par di hit pa e wega termina cu score di 6-4.E hoben Westerhof a di ATCO Indians a tira un bon partido pa su equipo.

Cu e victoria aki ATCO ta ocupa e prome puesto cu dos wega gana sin wega perdi.Dialuna e campeonato ta sigui ora cu Aruba Investment Bank Rockets lo enfrenta Polar/Ice Cushina di mi Mamam Sluggers.

Diarazon San Nicolaas Braves/Stars lo topa cu Oranjestad BBO, diahuebs ATCO Indians lo topa cu Valero mientras cu San Nicolaas Braves/Stars lo midi forza Diabierna.

Fanaticada di bon baseball ta keda cordialmente invita pa asisti na e partidonan di baseball na tereno di Dragon Hitters Ball Park na Barcadera pa 7:45 anochi.

- Advertisement -

1 COMMENT

  1. bondia,
    un pabien grandi na O’stad BBO , cu a sa di wanta e campeonan di anja pasa, nan a kere cu nan lo bin gana fasil.
    Un coreccion. E nomber di nos pitcher tra JERROLD D. TROMP.

DUNA COMENTARIO

Please enter your comment!
Please enter your name here