Home Deporte Resultado di vuelta di Barcadera Cliff Henriquez Memorial 2009

Resultado di vuelta di Barcadera Cliff Henriquez Memorial 2009

7
0
SHARE
- Advertisement -

ciclismo1ORANJESTAD (AAN)— E coredor Franklin Gomez a resulta como vencedor den Cliff Henriquez Memorial 2009. E tradicional careda ciclistico di Club di Ciclismo Barcadera, desde 2003 hibando e nomber tambe di Cliff Henriquez Memorial, e aña aki a conoce un bon ganador den Franklin Gomez (San Fuego Cycling Club) cu a decidi e campeonato di tres etapa den e ultimo etapa. Diasabra 5 September a inicia cu un time trial individual na Barcadera, cu a resulta den un victoria pa Gino Hodge cu apenas dos seconde di bentaha riba Franklin Gomez. Diasabra atardi den un careda di circuito na Cobalodo atrobe Gino Hodge a vence, e biaha aki den un sprint final cu Franklin Gomez cu un diferencia di algun centimeter, manteniendo asina su bentaha minimo.

Diadomingo mainta den e circuito dificil di Warawara cu tabata escenario di e ultimo etapa sin embargo otro situacion a presenta. Despues di algun ataque chiquito sin consecuencia, Victor Vrolijk a escapa pa despues haya compania di Franklin Gomez, cu a bay laga Gino Hodge.

Despues di un rato caba Franklin Gomez a mantene e velocidad asina halto, cu Victor no por a keda cune. Di e momento ey te na final Franklin a keda su so dilanti, mientras cu Gino Hodge a cay atras completamente y hasta a ser alcanza pa Franklin Gomez.

Tal vez su participacion na e 10 km di careda na pia di Turibana – Santa Cruz riba e mesun mainta a hunga un papel cu e no tabata den condicion pa competi na e nivel aki. Na di dos lugar a keda Victor Vrolijk cu a core un careda regular, demostrando un progreso significativo. Gino Hodge a termina na tercer lugar.

Den categoria di Submasters Andrick Fingal no a conoce problema pa sali vencedor, cu Carlos Dirksz y Nacho Bareño respectivamente na di dos y tres puesto. Alexander Robert a gana categoria di Juniors dialnti John vd Biezen, pero cu un prestacion bao nivel Diadomingo di Alexander, cu tambe a core e careda di 10 km mainta tempran.

Doreen Kralick a sali ganador den categoria Damas dilanti di Daniela Chica, mientras cu Jan Hendrik (Jenny) Flanegin a logra victoria den categoria Masters, cu Dion Croes na di dos lugar. Jean Marc Croes a logra supera un desbentaha riba su rivalnan den e ultimo etapa pa bay cu e prome premio den categoria Pre-juniors, cu Arthur Farro y Emre Esitmez na e otro puestonan di honor.

Den e categorianan infantil, Amy Pichardo y Jeandrick Croes a gana den categoria I (6 – 7 aña); den categoria II (8 – 9 aña) Boys Akeem Kock a logra kita desbentaha pa gana e categoria aki dilanti di Miguel Thiel y Kendrick Pichardo.

Den categoria III (10 – 12 aña) Girls Jeannice Croes a sali ganador dilanti Sophie Mackintosh, mientras cu den Boys III Chester Hill a sali victorioso lagando Justice Dreischor y Joao da Silva na di dos y tres lugar.

Den categoria IV (13 – 14 aña) Girls Jeanira Croes a gana pero mester a laga dos final di sprint bay pa Emileen Kock cu a keda na di dos lugar y Geraldine da Silva na di tres lugar den clasificacion final.

Javier Hoek no a laga duda ken ta actualmente den mihor condicion den cat. IV Boys, a pesar di perde sprint den ultimo careda di Gershon Irausquin cu a termina na di dos lugar dilanti di Edrick Krozendijk (3).

Pa completa e evento tabatin tambe un competencia di mountain bike cu a hiba e coredornan pa Parke Arikok y di regreso pa start/finish na Urataca Center. Ganador a resulta David Flanegin, cu Gert van Vliet na di dos lugar y Rene Franken na di tres puesto.

Club Ciclismo Barcadera por manda e evento aki pa archivo como uno bon organisa, cu bon participacion tambe di varios ciclista cu a haci nan come back (Jose Maduro, Arthur Farro, Clinton Figaroa) of cu a cuminsa participa den ciclismo di ruta tambe (Nacho Bareño). Ta di spera cu nan lo continua pa duna competencia di ruta mas realce.

Un palabra di gradecimento ta bay na e patrocinadornan cu a haci e evento posible, un mencion special mester haci di Rupert Ammerlaan (Club Ciclismo Barcadera) cu atrobe tabata e atleta di mas edad (70 aña) den e evento, pa cual el a ricibi un reconosemento di e organisacion. Rupert Ammerlaan ta sigui un ehempel pa atleta hoben y grandi den tur deporte.

- Advertisement -

DUNA COMENTARIO

Please enter your comment!
Please enter your name here