Home Deporte Bon Kendo di Aruba durante 14 Mundial di Kendo

Bon Kendo di Aruba durante 14 Mundial di Kendo

9
0
SHARE
- Advertisement -

kendo1ORANJESTAD(AAN)—Un seleccion chikito di kendoka arubano a duna acto di presencia na e di 14 World Kendo Championship, na São Paulo, Brasil. Solamente 2 atleta masculino y 1 femenino a representa nos pais na e campeonato mas prestigioso na Mundo. Aunke e plan original tabata existi pa manda ekiponan masculino y femenino completo, cada un di 5 atleta, esaki no a resulta posibel. P’esei a dicidi di manda solamente esunnan mas prepara y mas entrega na e disciplina di Kendo na e momentonan aki. Björn Brandts (2-dan) ta e campeon reinante di Aruba y hunto cu Ademir Vrolijk (2-dan, ex campeon di Aruba) el a representa Aruba den e categoria Masculino Individual. Pa e damas, Angela Lie-A-Lien tabata nos representante. Durante 6 siman, e seleccion aki a train casi tur dia y hopi duro pa ta prepara pa e nivel mas halto.

Björn a cuminsa bon cu ippon gana riba su contrincante checo, pero pa falta di concentracion a perde 1-2. Ya cu su oponente tambe a gana su di dos partido, Björn tabata elimina caba prome cu bringa su di dos wega contra un irlandes.

E pelea aki el a gana facilmente (2-0) pero ta trata di ‘best out of 3 players’ y e di dos lugar den e grupo aki no tabata suficiente pa sigui pa e trayecto eliminatorio.

kendo2Ademir a enfrenta e campeon europeo, un hungaro hopi fuerte. Sin embargo, Ademir a keda den bon comunicacion cu su coach, Sergio Velásquez, y casi a logra un sorpresa. Lamentablemente, e mester a tolera un ippon den su contra pa locual el a perde e partido (0-1). Su di dos pelea contra un mexicano tambe tabata uno hopi sera, pero tambe esaki a bay perdi (0-2).

Asina tur dos candidato arubano a keda elimina prematuramente, locual tabata algo decepcionante pasobra e meta pa e mundial aki tabata sikiera un atleta den e di 2 of di 3 round.
Nos speransa tabata cifra awor den nos candidata femenino, Angela Lie-A-Lien (ex campeon di Caribe y Centroamerica).

Su prome partido no a sigui pa motibo di retiro di su oponente dominicano. Awor e mester a gana su di dos partido pa por sigui pa e fase eliminatorio. El a toca cu e number 1 di Nieuw-Zeeland y e pelea tabata hopi skerpi di ambos banda.

Afortunadamente Angela a logra conecta un golpi riba e kote (pols) di su oponente y a logra wanta e presion te na final. Asina Angela a progresa pa e eliminatoria pa enfrenta Kimura di Brasil, un kendoka experiencia di descendencia hapones. Atrobe e wega tabata hopi sera y ambos damas a parti sla sin logra e ippon decisivo.

Casi na final, Kimura a ataca e kote di Angela y aunke e atake aki no a conecta 100% bon, toch 2 di e 3 arbitro a duna e punto. Cu esaki Angela tambe a keda elimina, pero no sin laga un impresion fuerte atras cerca e publico.

Den e curso di e torneo tabata bisto cu Hapon a restablece su hegemonia despues di a perde e corona 3 aña pasa contra Merca y Korea. Tanto den masculino como femenino, individual y ekipo, e puestonan maximo tabata pa e haponesnan. Solamente den e semifinal masculino individual e coreanonan a sobrevivi cu tres representante pero e unico Hapones (Teramoto) a bay cu e premio.

E dia despues di e ultimo competencia tabatin examen di dan. Angela (2-dan), Björn y Ademir (ambos 3-dan) tabata exitoso y a pasa convincentemente cu nan Kendo bunita y fuerte. Lamentablemente coach Sergio Velásquez no a logra den su intento pa alcansa e di 7 dan, pero e examen aki tin un promedio di 12 biaha (¡!) prome cu slaag. Ya cu esaki tabata su prome prueba e animo a keda halto pa train mas duro ainda.

Durante e Asamblea General di International Kendo Federation (FIK) e Confederacion Latinoamericano di Kendo (CLAK) a keda estableci. Un logro pa Aruba ya cu nos ta un di e prome propugnadornan pa yega na un union latinoamericano den Kendo.

Bun Bu Itchi/Kendo Aruba ta gradici Sportsubsidiecommissie y ASU pa nan sosten pa por participa na e importante eventonan aki.

- Advertisement -

DUNA COMENTARIO

Please enter your comment!
Please enter your name here